Rembrandt van Rijn

Dr Rembrandt Harmenszoon van Rijn (* 15. Juli 1606 z Leiden; † 4. Oktober 1669 z Amsterdam; bekannt under sim Vornaame Rembrandt) gältet as äine vo de bedütendste und bekanntiste niiderländische Künstler vom Barock. Er het wääred em Goldige Zitalter vo de Niiderland gschafft, wo s Land e bolitischi, wirtschaftligi und künstlerischi Blüetezit erläbt het. Dr Rembrandt het bim Pieter Lastman studiert, 1625 z Leiden si ersts Ateliee ufdoo und scho bald d Ufmerksamkäit vo de Lüt uf sich zooge. 1631 isch er uf Amsterdam züüglet, won er sich zum ene gfiirte Künstler entwicklet het. Drotzdäm het er immer wider groossi finanzielli Brobleem ghaa und isch 1656 in Konkurs gange und isch schliesslig in Armuet gstorbe.

Dr Rembrandt het as Mooler, Radierer und Zäichner gschafft, het e Wärkstatt gläitet und Künstler usbildet. Si Gsamtwärk umfasst under anderem Bordret, Landschafte und biblischi und mythologischi Themene. Zu sine bekanntiste Arbäite zele D Bländig vom Simson, D Nachtwach, D Anatomii vom Dr. Tulp und S Hundertguldeblatt. In sine Historiebilder het dr Rembrandt e Hufe Motiiv ufgriffe, wo bis denn künstlerisch nid bearbäitet worde si, oder het noch nöije Darstelligsmögligkäite für dradizionelli Motiiv gsuecht. E Hufe vo dene Wärk zäichne sich dur starki Hell-Dunkel-Kontrast us, und dorum gältet er as e Mäister vom Chiaroscuro.

Im Rembrandt sini Bilder si scho zu sine Läbzite kopiert worde. Noch sim Dood het mä sini koloristischi Moolwiis in dr Kunstkritik und Kunstliddratuur vom Klassizismus negativ bewärtet, aber sini Wärk si bi de Sammler seer beliebt gsi und düür verchauft worde. Im 18. Joorhundert het dr Rembrandt Noochfolger under de dütsche und änglische Künstler ghaa. Si Lääbe isch in dere Zit müstifiziert und mit Legände usgschmückt worde; erst in dr Middi vom 19. Joorhundert het mä us däm Rembrandt-Bild dur Kwelleforschig si Lääbe rekonstruiert. Sit de 1970er Joor beschäftigt sich s Rembrandt Research Project mit dr Erforschig vo de Wärk vom Rembrandt und het deren iiri Authentizität undersuecht. So isch d Zaal vo de Bilder, wo cha bewiise wärde, ass si dr Rembrandt sälber gmoolt het, uf öbbe 350 gsunke.